中文 (香港)  English (US) 
10個令安全套失效嘅原因

10個令安全套失效嘅原因

安全套係性行為期間爛咗?😱 完事之後至發現安全套穿咗?😰 發生親密行為果陣,好多人都會選擇用使用安全套,貪佢方便易用。但唔正確使用有機會令安全套係過程之中破裂,發揮唔到應有嘅保護作用 🥺以下同大家分享10個有機會令安全套失效嘅原因,大致分為3個大方向——包括「使用過程」、「存放不當」同「規格問題」。 



💫 使用過程💫 
1️⃣ 正反調轉
最常出現嘅意外喺將安全套正反調轉咁套咗入陰莖。正面嘅時候安全套嘅膠圈應該向出,如果膠圈被套套包住嘅話就表示係反面。當反轉咗嘅安全套已經掂到陰莖,就有機會沾到尿道球腺液Pre-cum,呢種分泌物都有機會含有精子。如果就咁反返轉嚟用的話,其實分泌物就會直接掂到將要插入嘅地方🤯,例如陰道或肛門。所以如果發現反咗,都係攞一個新嘅安全套使用啦~

2️⃣ 無擠出儲精囊內空氣
將安全套套入陰莖嘅時候,如果無按實安全套頂端嘅儲精囊,令空氣排出,就有機會導致空氣同安全套摩擦。係射精嘅時候亦會因無足夠嘅空間暫存精液,令氣壓有機會整穿安全套💥。所以套入安全套之前,要確保儲精囊裡面嘅空氣已經擠出。

3️⃣ 無按實安全套的底部就取出陰莖
好多人射精後都好心急直接將陰莖就咁抽出,但因為無同時按實安全套嘅底部,而令安全套漏咗係對方體內,或者半脫離對方😨,令安全套裡面嘅分泌物意外流咗出嚟,增加風險😢。所以,係射精之後要盡快「緊握安全套嘅底部地取出陰莖」,確保兩者同時離開身體。

4️⃣ 安全套唔夠潤滑
安全套嘅表面唔夠潤滑,磨擦太強都有機會磨穿安全套。好多時安全套表面附有嘅潤滑劑都係唔足夠支撐整個性行為過程,而人體嘅分泌物量亦會隨唔同因素而變化。所以用安全套嘅時候都可以配搭潤滑劑一齊使用,確保潤滑度💦。 

5️⃣ 安全套嘅材質同潤滑劑不相容
承接上面安全套唔夠潤滑,需要使用潤滑劑嘅建議方法。要留意嘅係油性潤滑劑係唔可以同乳膠造嘅安全套一齊使用, 因為油性嘅物質會侵蝕乳膠,增加安全套破裂嘅機會💔。水性、矽性或者水矽混合型嘅潤滑劑就可以同乳膠安全套一齊使用。想知多啲有關潤滑劑嘅資料可以睇番之前嘅 post : Stickypedia系列-安全性行為:第二寶🌟 我哋之後亦會深入講解常見嘅安全套材質,等大家了解多啲~

6️⃣ 尺寸唔合適 
尺寸唔合適都係常見令安全套失效嘅原因,太鬆有機會係過程中脫落🍃,而太緊就有機會係途中爆開!市面上嘅安全套都係有分Size架,一般盒上面都會標明呢款安全套嘅「寬度」或者「直俓」。「寬度」通常都喺歐美同香港牌子常用,而「直俓」通常都喺日本牌子常用。下一篇我地會詳細講解點樣量度去得出呢兩組數字📏,同埋分享一啲購買小貼士。



💫 存放不當💫
7️⃣意外被尖銳物戳破
唔同嘅尖銳物都會有會整穿安全套!例如用手捲開安全套嘅時候,指甲可能會意外刮穿⚡;其他尖銳物,例如牙齒同戒指等等亦有機會令安全套出現一啲肉眼難以發現嘅小破口👀。所以接觸安全套嘅時候都要額外小心!

8️⃣ 唔適當地放置 
儲存係唔恰當嘅環境都有機會令安全套無法發揮功效。潮濕、高溫、被陽光直射等等都會降低安全套嘅壽命☠️,而折起放入銀包或者褲袋呢啲經常會摩擦嘅地方亦有機會令安全套破裂。所以都建議大家將安全套放返係本身嘅包裝盒入面(仲可以清楚睇到過期日),或者放係小鐵盒裡面帶出街,唔好隨便放置~

💫 規格問題💫
9️⃣安全套過期
過期嘅安全套可能會變質,導致出現意料之外嘅問題。例如有機會因過期變得脆弱,而承受唔到大量磨擦。另外,大部分安全套表面都會附有潤滑劑,一旦過期都有機會引起過敏。所以係打開安全套包裝嘅時候,記住檢查一下過期日啦📅~

🔟誤用不合規格的安全套
安全套係出售前都會經過唔同嘅品質測試,分別喺「空氣爆破測試」,確保安全套承受到至少18公升嘅空氣,保障安全套嘅韌度;同埋「注水測試」,保障安全套唔會出現滲漏問題。所以都建議選擇安全套嘅時候選擇商譽良好嘅品牌, 避免選擇雜牌同未經過測試嘅安全套品牌😚。

分享完10個常見導致安全套失效嘅原因之後,大家日後使用嘅時候都要小心注意啦!之後兩篇文我哋會詳細分享點樣量度去選擇合適自己嘅安全套尺寸,同埋安全套常見嘅材質種類以及一啲購買小貼士。有興趣嘅朋友記住留意啦😏~


TEXT: CLAIRE
———————————————
糖不甩|性教育|網上性健康平台💛
對性/性別/關係...有疑問?想搵人傾下?
糖不甩討論區隨時ready答你問題!識揀,一定揀糖不甩!
Discuss.stickyricelove.com

#stickyricelove #糖不甩 #sexeducationhk #性 #性教育 #gender #relationships #sex #hksex #hklove #hkboys #hkgirls #安全套 #condom #套套 #安全套爛咗 #安全套爆咗 #SRL安全套

原文刊於糖不甩網誌,本網站經糖不甩授權轉載。