中文 (香港)  English (US) 
前戲系列:關於依道菜嘅迷思

前戲系列:關於依道菜嘅迷思

《Stickypedia系列 – 前戲:前戲必學五件事 (5)

去到關於前戲嘅最後一個post喇,今次就解答下社會上面一啲對於前戲嘅誤解或者問題啦。

 

1 – 前戲越長越好?

所謂嘅「好」係應該係按照你同性伴侶嘅反應去斷定嘅,所以無話好絕對嘅「長就係好」或者「短就係唔好」。咁但係都可以有啲數字俾大家參考一下。男性就平均覺得係18.1分鐘,而女性就係18.93分鐘。可見,女性對於理想前戲嘅時間長度比男性長。當中嘅因素可能係因為女性身體上比男性更加難達到性興奮,所以希望透過更加長嘅前戲令自己可以更加投入。另一個可能嘅原因係因為女性比較容易透過陰蒂刺激達到性高潮,而通常呢個都係前戲嘅一部分。反之男性更加容易透過插入式性行為而得到高潮,所以男性有機會想更快進行插入式性行為,令自己盡快得到性高潮 [1]。 

2 – 前戲對男性黎講無吸引力?

前戲對於男性來講其實係有吸引力嘅!首先,透過前戲,男性可以從愛撫、親吻之中增加對伴侶嘅親密感,亦可以從前戲嘅唔同活動得到更多性興奮,令整個過程更加歡愉。因此,前戲對於男性來講一樣係重要嘅。另外,以異性之間嘅性行為來講,女性係前戲會比較容易感到性興奮,好多人會因而認為前戲係俾女性嘅享受,而男性係對前戲無興趣。但其實呢個情況好想都係因為社會上嘅性別定型而造成:假定咗「男性對前戲無興趣,女性就一定希望有好長嘅前戲」。而喺1984年,Barbach將呢啲性別定型影響人對前戲同插入式性行為嘅長度嘅認知命名為 Cultural Role Script [1]。一個人嘅Cultural Role Script會影響佢對伴侶性愛喜好嘅推測。就係呢個例子裏面,大眾會覺得男性對於前戲嘅興趣比較低,所以會嘗試為男伴減少前戲時間。雖然前面所講嘅理想嘅戲時間長度,女性係比男性長。但去到實際嘅前戲時間(Performance Script),女性係11.25分鐘,而男性進行前戲嘅時間就係13.35分鐘,係比女性長多過2分鐘。由此可見,「前戲係女性嘅專屬部分」係唔正確嘅。不論任何性別,都可以喜歡同享受前戲架!

 

3 – 同性性行為無前戲?

社會大眾對同性性行為仲有好多誤解,其實任何性別之間、任何形式嘅性行為都係需要有前戲。一般都係會有親吻、愛撫、接觸私處等行為。就陰道同陰道交(Vulva-to-Vulva)而言,伴侶之間都可以用手或舌頭刺激陰蒂、刺激陰道內嘅G-spot、善用性玩具及用手磨擦肛門附近嘅皮膚等等,令到大家得到性興奮。另外,就陰莖同陰莖交(Penis-to-Penis)而言,伴侶一樣會輕撫或者舔陰莖、會陰、運用性玩具及舔肛等。所以,前戲嘅方法係適用於所有人,集中係身體刺激同情感交流上,並無性傾向之分架!

4 – 一齊耐咗嘅伴侶嘅前戲會長啲?

一般而言,一齊比較耐嘅伴侶嘅前戲同埋性行為都會比較短[1]。相對於一齊無耐嘅伴侶來講,相處得耐啲嘅情侶發生過比較多次嘅前戲同性行為。所以佢哋對於對方嘅喜好、點樣做前戲同埋性行為都會比較熟悉,容易啲一擊即中。但係,一齊得耐嘅伴侶仍然可以一齊探究更多關於前戲同埋性行為嘅方法,例如:轉換唔同嘅場景、環境氣氛、運用嘅性玩具(或者有無運用性玩具)、衣着及姿勢等等。透過不斷嘅探索,不單止可以有更多樣化嘅性刺激同享受,不斷同伴侶溝通嘅過程中,亦會令到雙方嘅親密感增加。

最後,前戲並無所謂嘅公式,而要有一個令人歡愉嘅前戲係要靠大家之間不停嘅探索同溝通,亦都需要伴侶之間有共識同埋互相尊重先至係一個合適你哋嘅前戲。希望呢五個post可以幫到大家更加了解前戲嘅用處、方法,亦解答咗有關嘅疑問。如果有其他關於性嘅問題,歡迎大家留言或者pm我地,大家一齊交流下!

 

參考資料:

[1] Miller, A. & Byers. S. (2004). Actual and Desired Duration of Foreplay and Intercourse: Discordance and Misperceptions within Heterosexual Couples. The Journal of Sex Research 41 (3), 301-09.

 

TEXT: QUEENIE (糖不甩義工)
GRAPHIC: KITTY

 ———————————————

糖不甩|性教育|網上性健康平台
對性/性別/關係...有疑問?想搵人傾下?
糖不甩討論區隨時ready答你問題!識揀,一定揀糖不甩!
Discuss.stickyricelove.com

#stickypedia #stickyricelove #糖不甩 #stickypediaforeplay #stickypedia前戲
#五大寶品 #缺一不可 
#sexeducationhk #性 #性教育 #gender #relationships #sex #hksex #hklove #hkboys #hkgirls

原文刊於糖不甩網誌,本網站經糖不甩授權轉載。